அப்தாலி சோதனையை கையில் எடுத்த பாகிஸ்தான் – இந்தியாவுடன் தொடர்ந்து சீண்டல்

இன்று பாகிஸ்தான் அப்தாலி ரக ஏவுகணைகளை சோதனை செய்துள்ளது.இந்தியாவிற்கும் பாகிஸ்தானுக்கும் இடையிலான உறவுகள் மோசமடைந்து வரும் நிலையில் இச்சோதனை நடைபெற்றுள்ளது.இது 450 கிலோமீட்டர் தூரம் வரை சென்று தாக்கும் வல்லமை கொண்டது. தரை இலக்குகளை தரையிலிருந்து சென்று தாக்கும் ஏவுகணை ஆகும்.

பஹல்காமில் நடந்த பயங்கரவாத தாக்குதலைத் தொடர்ந்து பாகிஸ்தானுடனான இராஜதந்திர உறவுகளை இந்தியா குறைத்த சில நாட்களுக்குப் பிறகு இச்சோதனை நடைபெற்றுள்ளது.

பாகிஸ்தான் ராணுவம் தனது அதிகாரப்பூர்வ அறிக்கையில், ஏவுகணை ஏவுதல் “பயிற்சி INDUS” இன் ஒரு பகுதியாகும் என்று கூறியுள்ளது. மேலும் “இந்த சோதனை துருப்புக்களின் தயார்நிலையை உறுதி செய்வதையும், ஏவுகணையின் மேம்பட்ட வழிசெலுத்தல் அமைப்பு உள்ளிட்ட முக்கிய தொழில்நுட்ப செயல்பாடுகளை சரிபார்ப்பதையும் நோக்கமாகக் கொண்டது” என தெரிவித்துள்ளது.

இந்த சோதனையின் போது ராணுவ படைகளின் தளபதி உட்பட மூத்த அதிகாரிகள், விஞ்ஞானிகள், பொறியாளர்கள் கலந்து கொண்டதாக பிடிஐ செய்தி வெளியிட்டுள்ளது.சோதனைக்குப் பிறகு பாகிஸ்தான் அதிபர் ஆசிப் அலி சர்தாரி, பிரதமர் ஷெபாஸ் ஷெரீப் உள்ளிட்டோர் விஞ்ஞானிகள் மற்றும் பொறியாளர்களுக்கு வாழ்த்து தெரிவித்தனர்.

நியூஸ் 18 செய்திகளின்படி, இந்த நடவடிக்கை இந்தியா மீதான அதன் தொடர்ச்சியான மோதல்போக்கின் வெளிப்பாடாகவும், ஆத்திரமூட்டும் நடவடிக்கையாகவும் பார்க்கப்படுகிறது .

பஹல்காம் பயங்கரவாதத் தாக்குதலுக்குப் பிறகு அடிக்கடி அரபிக் கடலில் கடற்படை பயிற்சிகளை நடத்துவதன் மூலமும், எல்லைக்கட்டுப்பாட்டுக் கோட்டில் மீண்டும் மீண்டும் போர்நிறுத்தத்தை மீறுவதன் மூலமும் பாகிஸ்தான் தனது வரம்புகளை மீறி வருகிறது.

இஸ்லாமாபாத்தின் ஏவுகணை சோதனை வேண்டுமென்றே இந்தியாவுடனான பதற்றங்களை அதிகரிக்கும் பொறுப்பற்ற முயற்சியாக தெரிகிறது.

பாகிஸ்தானியர்களின் விசாக்களை ரத்து செய்தல் மற்றும் சிந்து நதி நீர் ஒப்பந்தத்தை நிறுத்தி வைத்தல் உள்ளிட்ட பல கடுமையான நடவடிக்கைகளை இந்தியா சமீபத்தில் பாகிஸ்தானுக்கு எதிராக எடுத்தது.

பாகிஸ்தான் கொடியை பறக்கவிடும் கப்பல்கள் இந்திய துறைமுகங்களுக்குள் நுழைவதற்கு இந்தியா தடை விதித்துள்ளது, அதே நேரத்தில் பாகிஸ்தான் இந்திய கப்பல்கள் மீது பரஸ்பர கட்டுப்பாட்டை விதித்துள்ளது.